HH
Euskal Herriko ikastolotan hIZAN proiektua da gure ardatza. Horrek esan nahi du, haurra erdigunean kokatzen dugula, bera baita bere garapenaren protagonista eta inguruan gauden profesionalok prozesu horretan bidelagunak garela.
Informazio gehiago:
Horretarako, gure ikastolan espazio erakargarriak, aberatsak eta irekiak sortu ditugu. Bertan eskaintzen ditugun materialei, etxekotasun giroari, estetikari eta profesionalen esku-hartzeari erreparatu diegu bereziki, haurrak dituen beharrizanei erantzuteko (loa, jana, atxikimendua, ikasteko gogoa, beste haurrekin egoteko desioa, …) eta bere erritmoa errespetatuz dituen ahalmenak garatzeko.
Espazio horretan haurrak adin desberdinetako kideak aurkitzen ditu haiekin hainbat jarduera eta rol jokatuz.
Haurra ikastolara etortzen den momentutik eta egunez egun, etxe eta ikastolaren arteko lotura zaintzen dugu goxotasunez, malgutasunez eta behar den denbora hartuz, umea lasai, ziurtasunez eta konfiantzaz esploratzen eta jolasten jarduteko, haurrak horrela ikasten baitu.
Profesionalen eta familien arteko komunikazioari garrantzia handia ematen diogu. Horregatik, harrera unean, zein beharrizana dagoen momentu guztietan, elkarren berri izateko atea zabalik edukitzen dugu.